pinling3347台語文部落格

〈泰山跳愛河〉

    讀國民學校四年的時，政府開始實施「推行國語」政策，學校內面干哪會使講國語，禁止使用方言，若無著愛受處罰。彼个時陣，阮學校是採用同學間互相監聽、取締的方式。老師先分予每一个學生固定數量的紙牌，頂面有頓[tǹg]各人姓名的印仔；若是有學生講方言予人掠著，著愛交一支牌仔予掠著的人。老師每禮拜算一擺數[siàu]，學生的牌仔若減幾支著處罰摃幾下；牌仔較加的同學，表示認真共人取締，著會得著老師的獎勵。

    這種「國語掠台語」的政策一下開始實施，全校的氣氛忽然間變佮足恐怖。第一个禮拜，阮彼班干哪兩个同學無因為講「方言」予老師處罰，其中一个是外省囝仔，另外彼个本來話著足少。我一向活潑外向，又閣是班長，頭一禮拜講「方言」予人掠著的次數竟然是全班第一名；雖然有一半以上是為著執行公務，無小心講出母語，但是老師講我身為班長，愈應該做全班的模範，所以照摃不誤。

    第二禮拜，我講台語予人掠著的次數閣較濟，老師誤會我是刁工的，愈拍愈大下，害我的手腫佮若麵龜咧。

    我發現我的人氣愈來愈好，原來逐个攏等欲掠我講台語。今[taⁿ]這聲慘啦！連講話都感覺足危險，我一定愛想辦法來對付這的抓扒仔。

　第三禮拜，同學掠我講台語的次數又閣破紀錄，但是大部分攏予我駁回，未當成立。因為我想著一句聽起來是台語，其實又閣是國語的語詞－「泰山跳愛河」，刁工講予遐的抓扒仔聽。

　「喔…抓到了！」有同學已經等我足久啦 。

　「抓到？抓到什麼？」我涼涼啊回應。

　「抓你說方言啊！牌子拿來！」

　「我說方言？你告訴我，泰山跳愛河是什麼方言？」

　「泰山跳愛河？…泰山跳愛河，是台語啊！」

　「那…國語要怎麼講？」

　「國語…？咦？剛好也是泰山跳愛河耶！」

　「那就對啦！這樣，你可以抓我嗎？」我照計畫，用國語自我辯解。

　逐个攏笑佮攬腹肚，抓扒仔同學嘛感覺好氣閣好笑，毋敢閣共我討牌仔啦。

　這是1956年，半世紀前的代誌囉。即嘛想起來，雖然感覺當時足幼稚，但是，講家己的母語著愛煩惱受處罰，顛倒對天頂地外來的阿山仔北京話，煞變做是咱的國語，這敢毋是真悲哀？日治時代，台灣的國語是日本東京方言，但是最少總督府並無禁止台灣人講母語，所以雖然被殖民統治五十年，台灣人的母語完全攏無受損害。顛倒是國民黨政府佔領台灣了後，台灣人講母語煞變做是一種罪惡，實在是天地顛倒反。

    1985年教育部本來有完成一份「語言法」草案，其中規定「三人以上之公共場所，交談應使用國語。…違反者第一次警告，第二次罰鍰三仟元至一萬元。」因為輿論紛紛批判，當時的行政院長俞國華才不敢繼續推動立法。好佳哉彼个「語言法」無實施，若無，我的「泰山跳愛河」故事可能著愛重演。

    台灣人到底是踏破啥物人īn祖公的金斗甕？百外年來攏受外來政權統治，外來語竟然變做咱的國語？語言侵略的結果，四十歲以下這代，尤其是北部都會區，會曉使用台灣母語的人已經愈來愈少囉，連帶影響īn的子第，因為家庭內無母語環境，自然著無機會學母語。但是，有外濟人會煩惱佮關心這个母語危機？

　即嘛台灣人已經家己執政了，但是真濟人猶閣認未清「國語」的本質到底是啥物？可見國民黨政府的「國語」政策實在夭壽成功。

　台灣人啥物時陣才會當全部覺醒？台灣啥物時陣才會當有家己的國語？

    註：本文羅馬字採教育部公告之「台羅拼音」。