- Mar 24 Mon 2014 21:01
-
暴政
- Jul 04 Thu 2013 00:15
-
播田
界紃
銚秧仔 (借用-穀東俱樂部插秧祭 个相片)
會記細漢彼時，寒天攏是足寒，著算是開正了嘛抑寒sih-sih。下冬天秧仔上驚半眠落霜，秧仔會凍傷焦死去，暗頭仔看天氣毋就勢，阮阿爸道破(phòa)水落去淹，我看水攏淹過秧仔尾，問阿爸講按呢秧仔敢未淹死去？阮阿爸干焦講『憨囝，秧仔毋驚水，淹未死啦』。
抵過新正年頭，紡好个水田攏是人影，上會記彼工有夠寒，田水像冰仔水真嚴，脫赤跤踩(lop)落田塗，喙著緊哺豆仔。秧仔是囥佇秧船仔內，用倒退攄來播。田水留一屑仔爾爾，一來較好播，二來才看會著紃，較未播kah東倒西歪。
阿姊佮我个工課，是專門銚秧仔。秧仔陵一股一股，用秧銚將秧仔銚起來，看起來誠簡單，事實是有撇步。秧銚是一種像煎匙个鐵銚，若出力銚傷深，秧仔夾( kiap)傷濟塗會無好播，若是銚傷淺，秧仔根會割斷去，秧仔會失氣黃酸，誠十工後著復重貼。等秧篩仔內疊滇，道用扁擔擔去田岸頂囥，in才將篩仔囥落去秧船，若播若倒退，反光个水面，無諾久著變青翠，相放伴个好厝邊，講一寡大人个見肖笑話，煞未記跤胴予水嚴kah反烏去。
若講著播田割稻仔上歡喜个事誌，著是半晝仔有點心通食。佇彼个時代，作穡人比較著較散赤，三頓無啥油臊，做粗重个穡真緊枵，有點心通止飢，免講嘛歡喜。上捷煮鹹糜、豆仔糜，豬肉用水sa̍h熟醞豆油膏，菜脯米煎卵，鹹帶魚...，若是熱天會加一項米篩目。雖然簡單詮予人食，逐家嘛未嫌無鮮臊，顛倒食飽復較拼勢。青色个秧仔葉逮風搖，幾分地个水田換新衫，等待天工伯湊相共，向望有好收成，遮是播田人上簡單个願望。
- Jan 09 Wed 2013 02:07
-
拾(khioh)寶
- Dec 21 Fri 2012 23:42
-
火籠---入選海翁台語文學第132期月刊(現代詩)
- Nov 02 Fri 2012 00:19
-
逐家來學讀寫咱的台語文
- Oct 02 Tue 2012 22:36
-
鋸竹管破爿做竹刀--剝文旦柚
- Jul 23 Mon 2012 20:14
-
逮拜(tòe-pài )
- Apr 22 Sun 2012 00:40
-
兩支跤凸規台灣--陳立山醫師台語演講第一名
＜修訂版＞
鄉親啊！你敢有愛台灣否？主持人，各位會友，以下我所講的四項代誌，你若是攏毋捌做過，你就不如我愛台灣。啊擔是叨四件代誌這呢偉大？第一是鐵馬遊台灣，第二是泅水過日月潭，第三來登懸爬玉山，第四是用河洛話來~演~說。(多謝各位！) 今仔日看我的打扮嘛知影，我是欲來佮大家講一寡我騎鐵馬的經驗。
差不多三年前，我辭掉做了 12 年的工課，佇猶袂揣著新頭路進前，我決定欲去完成我自細漢的一個夢想----騎鐵馬踅台灣一輾。我的朋友聽講我欲去環島，攏嘛佮我揬臭(國語：吐槽)，怹說：「騎鐵馬呢？彼是少年人佇咧做的代誌！你莫三斤貓想欲咬四斤鳥鼠好否？彼足悿(國語：累)、足艱苦佮危險，莫去較袂出代誌啦！」，我才無咧佮信篤咧，我對怹說：驚驚袂得等啦，無試過按怎知影會成袂成？所以我就去報名參加一個專門抴人騎鐵馬環島的團體，出發的時間是 2005 年七月份，天氣當燒熱！我的運氣毋知是甚好還是甚歹，除了我佮另外一個阿水伯以外，參加的攏是一寡高中生、大學生，這個阿水伯大我三十歲，兩年前捌參加過一擺，毋擱伊佇咧騎南迴公路的時陣摔斷一隻跤，伊轉去休睏半年，鍛鍊一年，重新擱再來，我看這個範勢，想說，害矣！連這個老歲仔我恐驚嘛拼袂過，這幾工我一定攏吊車尾！欲出發的彼個早起時，彼的少年仔用一種同情的眼光看著我佮阿水伯講：阿叔、阿伯加油喔！千萬毋通勉強啊！然後怹就~咻~像一陣風衝對頭前去囉，偆(國語：剩)我佮阿水伯兩個人佇後壁慢慢啊凸，我向阿水伯講：「阿伯啊！雖然我這兩個月嘛有練過，毋擱我猶原真煩惱是毋是會當完成這擺的環島」，阿水伯老神在在佮我講：「安啦！咱騎鐵馬環島比的是長期的耐力，不是一時的氣力，等一下你就知影囉。」果然，當咱騎到桃園龜山那段連續13公里爬崎的時陣，彼的少年仔就開始哀爸叫母，十個有九個落車用搡(國語：推)的，毋擱咱兩人就是堅持毋落車、毋搡車；「毋管路面有多崎，只看眼前七尺闊」；橫直就是佮嘴齒根咬予緊，實實仔騎、寬寬仔騎，欸！竟然嘛騎到前幾名，所以我開始有了一寡信心，想欲佮這的猴死囝仔拼看覓。
人說：「行棋有棋步，宰豬有刀路」，騎鐵馬想欲拼頭前，實步以外嘛愛知影變步；咱攏知影世間路起起落落，有落崎當然就有爬崎，普通人騎鐵馬爬崎時攏是踏佮怦怦喘，落崎時當然愛放輕鬆，予車自己嚕落去，抑無頭拄仔拼佮流凊汗…毋就攏了去矣？你的想法干若到這，想欲贏人就較拼，咱愛會曉顛倒頭想-逆向思考，佇別人歇喘吐大氣的時陣，加倍打拼，等怹發現你對邊仔衝過去的時候，欲逐你嘛已經袂赴囉。萬不一咱若是抵到同款程度的對手欲按怎樣？這個時陣就要比啥人的藏步較厲害囉。藏步就是你的祕密武器，平常時就要偷偷仔準備好勢，佇要緊的時陣，生死的關頭，才會當提出來用。我的祕密武器就是-----國產的噴射引擎，保證予你走較緊，擔你嘛好啊！鐵馬抑無食汽油，叨位來的噴射引擎？我聽你咧歕雞胿！是啦，我的鐵馬是無食汽油，毋過真歹勢，鐵馬的主人有食~番薯~啦，其實，我佮這個蕃薯當做是一種心理武器，逐工騎車進前佮伊食兩條，當你騎了真痛苦，感覺有需要的時陣，就勇敢將伊放出來（~音效~）伊會當予你心內感覺：我有較緊！袂歹！擱予伊催落去（~音效~）嗯！抵才想欲放棄的彼個想法嘛親像放出去囉！橫直佇真艱苦的時陣，咱就是愛想辦法予自己感覺較好過，有當時你的尻川後如果抵好有人佮你綴著著，伊嘛是一種真有效的化學武器（~音效~），我就會當趁怹將鼻仔掩著的時陣，擱拼對頭前去，所以，佇這擺環島的前五工，我若不是騎第一個，就是騎第二個。
為什麼只有前五工騎在頭前？第六工以後發生了什麼代誌咧？敢講是有其他擱較陰險的藏步出現囉？毋是！是佇第五工的暗時，阿水伯問了我一個問題：「阿山哥啊！昨日咱騎在枋寮海邊仔日頭要落山的時陣，赫呢水的風景你敢有看到？啊猶擱有今仔日早起時咱佇咧拼南迴公路的時陣，有一欉足水的相思樹仔你敢有看到？」「阿伯啊！歹勢呢，我攏顧咧拼車，沒看到彼的風景」「啥！彼毋就足可惜矣！」是啊！我一直顧咧拼頭前到底有什麼意義咧？這敢是我來環島的唯一目的？按呢敢袂甚過無聊？甚過打損？所以對第六工開始，我就袂擱佮別人較車(國語：尬車)，我綴佇阿水伯邊仔慢慢仔騎，不時嘛停落來翕相(國語：拍照)看花草，欣賞正港台灣的水，尤其是蘇花公路彼一段，左邊是青色的山嶺，正邊是藍色的海岸，深崁(國語：懸崖)就在輾仔邊三尺外，一個無細膩，保證你隨跋落去太平洋底，真正是水到予你叫毋敢。
