播田

界紃

銚秧仔 (借用-穀東俱樂部插秧祭个相片)

會記細漢彼時，寒天攏是足寒，著算是開正了嘛抑寒sih-sih。下冬天秧仔上驚半眠落霜，秧仔會凍傷焦死去，暗頭仔看天氣毋就勢，阮阿爸道破(phòa)水落去淹，我看水攏淹過秧仔尾，問阿爸講按呢秧仔敢未淹死去？阮阿爸干焦講『憨囝，秧仔毋驚水，淹未死啦』。
        抵過新正年頭，紡好个水田攏是人影，上會記彼工有夠寒，田水像冰仔水真嚴，脫赤跤踩(lop)落田塗，喙著緊哺豆仔。秧仔是囥佇秧船仔內，用倒退攄來播。田水留一屑仔爾爾，一來較好播，二來才看會著紃，較未播kah東倒西歪。
        阿姊佮我个工課，是專門銚秧仔。秧仔陵一股一股，用秧銚將秧仔銚起來，看起來誠簡單，事實是有撇步。秧銚是一種像煎匙个鐵銚，若出力銚傷深，秧仔夾( kiap)傷濟塗會無好播，若是銚傷淺，秧仔根會割斷去，秧仔會失氣黃酸，誠十工後著復重貼。等秧篩仔內疊滇，道用扁擔擔去田岸頂囥，in才將篩仔囥落去秧船，若播若倒退，反光个水面，無諾久著變青翠，相放伴个好厝邊，講一寡大人个見肖笑話，煞未記跤胴予水嚴kah反烏去。
        若講著播田割稻仔上歡喜个事誌，著是半晝仔有點心通食。佇彼个時代，作穡人比較著較散赤，三頓無啥油臊，做粗重个穡真緊枵，有點心通止飢，免講嘛歡喜。上捷煮鹹糜、豆仔糜，豬肉用水sa̍h熟醞豆油膏，菜脯米煎卵，鹹帶魚...，若是熱天會加一項米篩目。雖然簡單詮予人食，逐家嘛未嫌無鮮臊，顛倒食飽復較拼勢。青色个秧仔葉逮風搖，幾分地个水田換新衫，等待天工伯湊相共，向望有好收成，遮是播田人上簡單个願望。