pinling3347台語文部落格

有成濟物件看起來phú-phú（灰），無啥價值，毋復若是稍整理一咧，道會成做足有路用的好物。最近稅佇隔壁的文具公司卜搬厝，有一寡退貨的文具無法度處理，原本囥佇地下室成久也，另外有一部分，是淹過水想卜撣掉。趁著這擺搬厝的機會，做一擺總清清咧較省麻煩。頭家看著問我講『這堆筆看汝有路用否，若是有用著，攏總送予汝』，問看我的意思是按怎？遐大堆的物件，是卜按怎發落咧？一時嘛想無欲按怎處理，無著先用車仔捒返來才復講。

    隔幾落日，夯幾支來畫土符仔，復未歹寫，色水嘛成濟。相連紲試一堆，歹的無幾支，只是外殼有烏烏，需要清洗予清氣爾爾。洗一部分的時陣，想講若卜總整理好勢，可能著愛歸禮拜，我無遐濟時間，無著寄出去予學生囝仔清洗會較緊。一時嘛毋知卜寄去佗位，啥人較需要這款文具。啊！來網路揣看覓咧，會有結果嘛無一定。有揣著一寡是育幼院；有的是私人的愛心機構；嘛有進前受過水災的學校...。大部分攏是舊資料，實在真歹決定。

    後來著抄幾个聯絡電話，準備敲過去問看in有需要否。當然物件卜予人，嘛著愛人有合意。拜一敲電話去聯絡，有的無接著；有的歇睏無上班。抵好仁愛鄉的*豐國小蔡主任接著電話，我說明緣由了後，伊問我愛寄感謝狀予我否，我講毋免啦！收著貨ka我講一聲道會使。另外佇花蓮有一个社區媽媽成立的團體，號做*葉部落萱草原成長班，in嘛成歡迎這批物件來相送。

       彼暗包裝好勢，隔返工聯絡新竹貨運來收貨，心肝頭做一咧清盈落來，春一箱卜拜託老師送出去爾爾，我知影老師真無盈，汰有時間去變這的。趁做工課進前先試水（墨水），試好才復泡沙拉脫落去洗，總洗好用巾仔拭拭予礁，才披開吹電風，吹一暝完全攏礁，隔工才詮好裝箱，等貨運行來收貨，我嘛通收煞這擺感覺成有意義的工課。